Кечээ, 15-майдагы Экономикалык жана фискалдык саясат боюнча комитетинин кезектеги жыйынында Жогорку Кеңештин 2017-жылдын 7-декабрындагы №2078-VI «Кыргыз Республикасынын мамлекеттик менчигин башкаруунун натыйжалуулугу жөнүндө» токтомунун айрым пунктарынын аткарылышы талкууга алынып, Өкмөткө караштуу Мамлекеттик мүлктү башкаруу боюнча фондунун төрагасы Ринат Тулебердиев баяндама жасады.
Белгилүү болгондой Мамлекеттик мүлктү башкаруу фонду 58 акционердик коомдо акционер болуп эсептелет. 2017-жылдын жыйынтыгы боюнча мамлекеттик бюджетке 2 млрд. 717 млн. сом түшкөн. Ал эми 2018-жылдын төрт айынын эсеби боюнча 534,4 млн. сом болуп, жылдык пландын 11,3%ы аткарылды.
Фонддун төрагасы Ринат Тулебердиев Өкмөттүн “Ишеним, биримдик, жаратмандык” программасынын алкагында бир топ иштер жасалып жаткандыгына токтолуп, 2018–2020-жылдарга карата мамлекеттик мүлктү эффективдүү пайдалануу жаатындагы жасалуучу иштер тууралуу маалымат берди.
Эл өкүлдөрү мамлекеттик мүлктөрдүн жалпы базасын түзүп, алардын инвентаризациялоо маселесин чечүү керектигин кошумчалашты. Алсак, депутат Акылбек Жапаров маселенин чечилбей жатышы көп көйгөй жаратып жатканын белгилеп: “Негизги коррупциянын булагы эмне мүлкүбүз бар экендигин жана алардын наркын билбегенибизде болууда. Андыктан Өкмөт инвентаризациялоону тездетүүсү зарыл”, – деди.
Мындан тышкары комитет жыйынында мамлекеттик мүлктөрдү башкаруу ишмердүүлүгүн көзөмөлдөө зарылчылыгы көтөрүлүп, фонддун карамагына алынган айрым объектилердин учурдагы абалы талкууланды.
Ошондой эле бүгүнкү жыйында бажы, чек ара жана салык жаатындагы маселелер боюнча атайын отуруп өткөрүү тууралуу да сөз болду.
