Жеткиликтүү турак-жай программасынын катышуучуларынын 552си ипотекага үй алды. Бирок 1476 жаран программадан баш тартты. Бул тууралуу өкмөт өкүлдөрү парламенттик жыйында депутаттардын суроолоруна жооп берип жатып билдиришти.
Үй алганга караганда, мамипотекадан баш тарткандарын саны эки эсе көп экенин белиглеген депутат Рыскелди Момбеков программа “арзан турак-жай эмес эле, арман турак-жай, жеткиликтүү эмес, жеткиликсиз турак-жай” болуп калганын айтып кейиди.
“Адамдар баш тартып атат, а банктар программадан баш тартпаптыр. Демек, аларга пайда бар. Мамлекеттик банктар аркылуу пайызды арзандатып, ипотеканы элге жеткиликтүү кылса болмок”, — деди депутат.
Премьер-министр Сооронбай Жээнбеков аз убакытта 500дөн ашык адам үйлүү болгону жакшы көрүнүш экенин айтып, алдыда программанын шарттарын жеңилдетүүгө иш-аракеттер жасалаарын айтты.
Быйыл башталган «Жеткиликтүү турак жай 2015−2020» программасы боюнча 500дөн ашык адам үй алса, өкмөт эмки жылы алардын санын 3 миңге жеткирүүнү мерчемдеп жатат.
