2010-жылы улутташтырылган мүлктөр «Мүлк» мамлекеттик ишканасынын фондуна киргизилген эмес. Ушу тапта улутташтырылган 16 объект оперативдик башкарууда турат. Ал эми жакында алынган «Караван» соода борбору приватташтыруу программасынын долбооруна киргизилген, учурда андагы 200 ижарачы ырааттуу иштеп жатат. Бул тууралуу Мамлекеттик мүлктү башкаруу фондунун төрагасы Ренат Түлөбердиев Жогорку Кеӊеш жыйынында «Мамлекеттик мүлктү ишенимдүү башкаруу жөнүндө» мыйзамдын долбоору каралып жатканда билдирди
«Мамлекет ижарадан түшкөн каражаттын 30 пайызын алат, ал эми калган бөлүгү «Мүлк» мамлекеттик ишканасында калып, ишкананы кармап турууга жана анда иштегендердин маянасына жумшалат. Жылдын аягында ишкана тапкан кирешесинин 50 пайызын кайра мамлекеттин эсебине которот. Мамлекет ага караганда оперативдүү башкарууга берилген мүлктөн көбүрөөк киреше табат», — деп кошумчалады фонд башчысы.
