Орусиянын Мамлекеттик думасы Кыргызстандын Орусияга карызын жөнгө салуу боюнча өкмөт аралык макулдашуунун протоколун ратификациялады. Бул тууралуу Кабар жазып чыкты.
2012-жылы Кыргызстандын жалпы карызынын суммасы 488,9 миллион доллар болчу. 2012–2013-жылдардагы сүйлөшүүлөрдүн негизинде Орусия 2013-жылы карыздын 188 миллион долларын кечкен.
Маалыматка ылайык, Бишкек Москвадан 240 млн. доллар карызынан кутулат. Кыргызстандын Орусияга болгон карызын кечүү тууралуу протоколго Кыргызстандын мурдагы президенти Алмазбек Атамбаев менен Орусиянын президенти Владимир Путин былтыр 20-июнда Москвадагы жолугушуусунда кол коюшкан.
Жогорку Кеңеш бул боюнча макулдашуу протоколун былтыр 2-ноябрда ратификациялап, мыйзамга президент Сооронбай Жээнбеков 9-декабрда кол койгон.
Орусия карызды кечкенден Кыргызстандын мамлекеттик тышкы карызынын көлөмү 6,5% кыскарат.
