Кызылордо облусунда былтыр 7,5 миңден ашуун тонна балыкты кайра иштетишкен, анын жарымы экспорттолгон. Балык өнүмүнө болгон суроо-талап КМШ өлкөлөрүндө гана эмес Европада дагы, жада калса Кытайда дагы өсүүдө. Кытайга биринчи балык өнүмдөрүн былтыркы жылдын акырында ташып барышканын 24.kz. жазып чыкты.
“Боген айылында жайгашкан өзүбүздүн сервистик борборубуз бар. Ал жакка Тастубек жана Уш шокы деп аталган жерлерден кармалган балыктарды алып барабыз. Жергиликтүү тургундар иштеген бир нече цехибиз бар”,-деди заводдун технологу Газиза Кулнияз.
Жаңы технологиялар жана заманбап жабдуулар заводго сапаттуу өнүм чыгарганга мүмкүнчүлүк берет. Баардыгына суроо-талап бар. Мисалы, филесин экспортко кетиришет. Төшү ички рынокко калат, калган бөлүгүнөн фарш жасалат, ал эми кылкандарынан болсо балык унун жасашып, куштардын жемине кошушат.
“Былтыр облус 3400 тонна балык өнүмүн экпорттогон. Алардын 70 пайызы же 2200 тоннасы Орусияга ташылган. 900 тоннадан ашууну Европа өлкөлөрүнө: Данияга, Нидерландыга, Польшага жиберилген. 60 тоннага жакынын биринчи жолу Кытайга жеткирилген”,-деди Жаратылыш ресурстарынын башкармалыгынын жетекчиси Жалгас Ахметов.
Учурда региондо 8 балык заводу иштейт. Алардын жылдык кубаттуулугу11 миң тоннанын түзөт. Ишканалардын экспорттук потенциалы акыркы 3 жылда эки эсеге өскөн.
