Кыргызстан жана SINO-Pipeline International Company Limited Кытай компаниясы «Кыргызстан — Кытай» газ түтүктөрүн куруу иштерин тездетүү керектигин билдиришти. Өнөр жай, энергетика жана жер казынасын пайдалануу мамлекеттик комитети билдиргендей, долбоордун баасы 1,2 млрд доллар. Курулуш иштерин 2019-жылдын акырында баштоо пландалууда. Долбоорду ишке ашыруу мөөнөтү 3 жыл.
Долбоор ишке ашса Өзбекстан, Тажикстан, Кыргызстан аркылуу түркмөн газы Кытайга жеткирилет.
Кыргызстандан 215 чакырым түтүк өтөт – Тажикстан менен болгон чек арадагы “Карамык” өткөрүү бекетинен Кытай чек арасындагы “Эркеч-Там” өткөрүү бекетине чейин. Кытай тарап баардык техникалык нормалар сакталарын билдирди. Курулуш иштери Кыргызстандын мыйзамына ылайык жүргүзүлөт. Кыргыз тарап желерди трансформациялоо жана жерлерди бөлүп берүү маселесин чечип берет.
Газ Кыргызстан аркылуу транзит болуп өтөт жана азырынча кыргыздар көгүлтүр от ала алышпайт. Газды транзит кылганы үчүн Кыргызстан 35 жыл бою 2 млрд доллардан алып турат.
Борбор Азия-Кытай газ түтүгү Борбор Азиядагы эң ири газ берүүчү система болот.
