Кыргызстандын жарандары Орусияга жана Казакстанга 2017-жылы берилген улуттук паспорттору менен (ID-карта) кире алышат. Бул тууралуу ТАСС Кыргызстандын ТИМине шилтеме берүү менен жазып чыкты.
“Орус жана казак тарап Кыргыз Республикасынын жарандары үчүн 2017-жылы берилген улуттук паспорттору менен Россия федерациясынын жана Казакстан Республикасынын аймагына кире ала тургандыгы тууралуу маалыматты тастыкташты”,-деп жазылат маалыматта.
Бул Беларус, Казакстан, Кыргызстан, Орусия жана Тажикстан өкмөттөрүнүн ортосундагы жарандардын визасыз кирип-чыгышы тууралуу 2000-жылы коюлган келишим, ошондой эле Кыргызстан, Орусия жана Казакстан тышкы иштер министрлери кол койгон ноталык макулдашуунун негизинде мүмкүн болуп жатканын Кыргызстандын ТИМи белгиледи.
Учурда Кыргызстандын жарандары чет жакка баруу үчүн чет элдик паспортторго жана идентификациялык карталарга ээ. Бул жылы ID-карталарды биометрикалык маалыматтарды камтыган паспортторго алмаштыруу башталды.
Бул документти бекер алмаштыруу үстүбүздөгү жылдын май айынан 31-декабрына чейин жүргүзүлмөкчү.
