Кыргызстанда пенсиянын орточо өлчөмү 6,4 %га өсүп, 5 миң 401 сомду түздү. Бул тууралуу КРнын Премьер-министри Сапар Исаков бүгүн, 17-апрелде, Өкмөттүн 2017-жылдагы ишмердүүлүгү тууралуу Жогорку Кеңеште «Республика-Ата-Журт», «Өнүгүү-Прогресс», «Ата-Мекен» фракцияларына отчет берип жатып айтты.
Сапар Исаков Пенсиянын орточо өлчөмү 6,4 %га өсүп, 5401 сомду түзгөнү ошол эле учурда пенсиянын базалык бөлүгү 280 сомго жогорулап, 1780 сом өлчөмүндө түзүлгөнүн, андан тышкары бюджеттин каражаттарынын эсебинен мамлекеттик жөлөкпулдарды төлөөгө 5,7 млрд сомдон ашык каражат жумшалган. Бул 2016-жылга салыштырганда 300 млн сомго же 6%га көп болгонун маалымдады.
Билим берүү секторуна 2017-жылы 33 млрд сомдон ашык каражат жумшалып, 2017-жылга бекитилген бюджетке карата 18%га көбөйгөндүгүн баса белгиледи.
«Орто билим берүү системасын маалыматташтыруу жана инновацияларды кийирүү максатында 2017-жылы бюджеттен 112 млн сом каралып, 775 мектеп Интернет тармагына кошулду. Жылдын аягында жалпы мектептердин ичинен 55%на Интернет жеткирилди. Муну менен бирге мектептерди санариптик телеберүүлөр менен камсыздоого бюджеттен 74 млн сом жумшалды. Мындан тышкары донорлордун каражаты менен 1,8 млн долларга инновациялык мектептер түзүлдү», — деди Премьер-министр Сапар Исаков.
