Жогорку Кеӊештин Экономикалык жана фискалдык саясат боюнча комитетинин демилгеси менен бизнес менен саламаттыкты сактоо тармактарындагы мамлекеттик-жеке өнөктөштүк маселелерин, тактап айтканда, «Кыргыз Республикасындагы мамлекеттик-жеке өнөктөштүк жөнүндөгү» мыйзамдын аткарылышын талкуулоого арналган парламенттик угуу өтүүдө. Иш-чарага вице-премьер-министр Дайыр Кенекеев баштаган өкмөт мүчөлөрү, мамлекеттик органдардын өкүлдөрү, жергиликтүү бийлик өкүлдөрү катышууда.
Тармактык комитеттин төрагасы Нурланбек Макеев бизнес менен саламаттыкты сактоо тармактарындагы мамлекеттик-жеке өнөктөштүк аракеттери өтө маанилүү маселелердин бири болуп саналарын баса белгиледи.
«Өзүӊөр жакшы билесиӊер, Президенттин Жарлыгы менен 2018-жыл өлкө аймактарын өнүктүрүү катары жарыяланды. «Кыргыз Республикасындагы мамлекеттик-жеке өнөктөштүк жөнүндөгү» мыйзамдын аймактардын өнүгүшүндөгү ролу зор. Муну жергиликтүү бийлик органдары туура түшүнүп, өз аймактарын өнүктүрүү жаатында бир топ алгылыктуу сунуштамаларды алат деген ойдомун», - деп, ал парламенттик угуу катышуучуларын талкууга жигердүү катышып берүүгө чакырды.
Ал эми вице-премьер-министр Дайыр Кенекеев алгачкы мамлекеттик-жеке өнөктөштүк жөнүндө мыйзам 2009-жылы кабыл алынып, көп жылдары иштебей келгенин, ошондон улам, 2012-жылы кайра жаӊыртылганын эске салды.
«Ошондон бери бул мыйзамдын алдында 8 ченемдик укук актысы иштелип чыгып, анын алкагындагы долбоорлорду каржылоо фонду түзүлүп, атайын программа кабыл алынган. Аны мамлекеттик-жеке өнөктөштүк мамилелерин жүзөгө ашыруунун «жол картасы» деп койсок да болот», — деп ал, ушу тапта жалпы көлөмү 166 млн долларды түзгөн 17 долбоор ишке ашырылып жатканын, анын ичинде саламаттык сактоо тармагына тийешелүү 4 долбоор бар экенин кошумчалады.
Жогорку Кеӊеште «Кыргыз Республикасындагы мамлекеттик-жеке өнөктөштүк жөнүндөгү» мыйзамдын аткарылышын талкуулоо жол-жоболору улантылууда.
