Бишкекте КРнын Экономика министрлигинин колдоосу менен халал-индустрияда жаңы стандарттарды киргизүү маселеси боюнча талкуу болду. Ага КРнын Экономика министри Артем Новиков, Муфтийдин орун басары Замир ажы Алымкул катышышты. Жолугушуу учурунда ишкерлер, дин өкүлдөрү, экономика министрлигинин өкүлдөрү өз каалоосу менен сертификат алуу, өнүмдү маркировкалоо жана Кыргыз Республикасынын аймагында кызматтардын халал стандарттарына ылайык келүүсү тууралуу талкуулашты.
“Евразиялык экономикалык биримдикке кирген өлкөлөргө, ЕБга, араб өлкөлөрүнө экологиялык жактан таза, сапаттуу халал өнүмдөрдү экспорттоону жогорулатууга Кыргызстандын потенциалы бар. Халал-индустрия биздин экономиканын өнүгүүсүндө маанилүү роль ойноруна ишенем”,-деди Новиков.
“Дин, укук жана саясат” көз карандысыз аналитикалык борборунун директору Кадыр Маликов белгилегендей, бул чечим өз убагында кабыл алынды жана халал индустрия бул биринчи кезекте ден-соолукка пайдалуу жана экологиялык жактан таза өнүм. Бул келечекте эл аралык рынокко чыгууга болгон чоң кадам жана келечеги кең.
Экономика министри 2017–2020-жылдарга карата КРда халал-индустрияны өнүктүрүү Концепциясы бекитилгенин кошумчалады.
КРнын Өкмөтүнүн 2017-жылдын 12-сентябрында Кыргызстанда азыктардын халал стандарттары боюнча маркировка жана сертификация боюнча токтом кабыл алган. Ага ылайык, “Халал” сертификатын өз ыктыяры менен алуучуларга сертификатты Кыргыз Республикасынын Экономика министрлигинин алдындагы Стандарттар жана метрология борбору берет.
“Жаңы система КРнын Муфтияты менен биргеликте пилоттук негизде ишке ашырылууда. Учурда 12 ишкана халал-сертификикациядан өтүштү. Ыктыярдуу сертификация жана маркировка баарынан маанилүү болуп турат. ЕАЭБде алкагында баардык тоскоолдуктар алынды. Долбоордо маркировка процесси башталганда керектөөчү азык тууралуу каалаган маалымат алганга мүмкүнчүлүк түзүлөт”,-деди Новиков.
