Кыргыз Республикасын туруктуу өнүктүрүү боюнча Улуттук кеңештин VI отуруму президент Алмазбек Атамбаевдин жетекчилиги алдында өттү. Отурумда 2018–2040-жылдарга өлкөнү туруктуу өнүктүрүүнүн «Таза коом – Жаңы доор» стратегиясынын долбоору талкууланды.
Президент Кыргызстанды 2040-жылга чейин туруктуу өнүктүрүүнүн улуттук стратегиясы мындан беш жыл мурда бекитилген/ 2017-жылга чейин туруктуу өнүктүрүүнүн Улуттук стратегиясынын логикалык уландысы экенин эске салды.
Президент ЕАЭБ тууралуу пикирин билдирди
Президент Алмазбек Атамбаев бизнес жана Кыргызстандын ЕАЭБке кирүүсү тууралуу маселеге да токтолду. Президенттин пикиринде өлкөдө бизнестин өнүгүшү үчүн чоң рынок керек. Кыргызстан эл аралык рынокко чыгуу максатында Евразия экономикалык биримдигине (ЕАЭБ) кошулганынын мааниси ошондо.
Ошондой эле президент Алмазбек Атамбаев өлкөнүн инфраструктурасын өнүктүрүү, Кытай-Кыргызстан-Өзбекстан темир жол магистралын куруу долбоорун турмушка ашыруу, Ташкент – Ош – Кашкар эл аралык автотрассаны ишке киргизүү жана ата-мекендик продукцияларды сатуунун башка альтернативалык рынокторун издөө зарылдыгын белгиледи.
Адам – өнүктүрүү стратегиясынын башкы максаты
Мамлекет башчысынын сөзү боюнча, 2040-жылга чейин туруктуу өнүктүрүүнүн Улуттук стратегиясы – бул эксперттердин чоң тобунун эмгеги. Анда Кыргызстандын мүмкүнчүлүктөрү эсепке алынган.
Отурумда Жогорку Кеңештин төрагасы Дастанбек Жумабеков, премьер-министр Сапар Исаков, жаңы шайланган президент Сооронбай Жээнбеков, фракция лидерлери, өкмөттүк эмес уюмдардын жана бизнестин өкүлдөрү сүйлөшүп, пикирлерин ортого салышты.
Сооронбай Жээнбеков: “Өлкөнү өнүктүрүүдөгү иштерди улантам”
Жаңы шайланган президент Сооронбай Жээнбеков өлкөнү өнүктүрүү жолунда улантуучулукту сактоонун маанилүү экенин, ошондой эле мамлекеттик бийликтин бардык бутактарынын, жеке сектордун жана жарандык коомдун күч-аракеттерин бириктирүүдө Улуттук кеңештин өзгөчө ролун баса белгиледи.
Ал Кыргызстанды 2040-жылга чейин туруктуу өнүктүрүүнүн улуттук стратегиясы коомчулуктун жигердүү катышуусу менен дагы жаңы идеялар жана сунуштар менен толукталаарына ишеним артаарын жашырбады.
Сапар Исаков: “Өкмөт 2019-жылга чейин толугу менен санарипке өтөт”
Кыргыз өкмөтү 2019-жылы толугу менен санарипке өтөрүн премьер-министр Сапар Исаков улуттук кеңештин отурумунда билдирди. Өкмөт башчы учурда ишке ашырыла баштаган “Таза коом” долбоору жана “Жаңы доорго 40 кадам” программасы 2040-жылга чейинки өлкөнүн өнүгүшүн камсыз кылган узак мөөнөттүү стратегиялык документ болорун белгиледи.
Өкмөт башчы эл аралык өнөктөштөрдүн жардамы программанын үч маанилүү компоненти ишке ашарын билдирди. Алар: “Таза суу”, “Ирригацияны өнүктүрүү” жана “Таза коом” санариптик трансформация программасы.
Талкуунун жыйынтыгында Кыргыз Республикасын туруктуу өнүктүрүү боюнча улуттук кеңештин мүчөлөрү 2040-жылга чейин өлкөнү туруктуу өнүктүрүүнүн Улуттук стратегиясынын долбоорун негиз катары кабыл алышты. Стратегиянын долбоору 2018-жылдын 15-февралына чейин толукталып, кабыл алынууга тийиш.
Назгүл Бостонбаева
