Каржы министрлигинин акыркы маалыматы боюнча Кыргызстандын тышкы карызы 4млрд 81млн долларды түздү. Бул ички дүң өнүмдүн дээрлик 57 пайызына туура келет. Анын эң чоң көлөмү коңшу Кытайдан алынган. Буга кошумча 23 мамлекет жана бир канча уюмдар дагы бар.
Кыргызстандын жалпы карызынын көлөмү 4 млрд 530 млн долларга жетти. Анын ичинен 4 млрд 80 миллион доллары тышкы карыз болсо, калган 449 млн доллар ички карызды түзөт.
Тышкы карыздын көрсөткүчү 2018-жылдын февраль айында 240 млн долларга азайды. Бул Орусиянын Кыргызстанга карата карызын кечкени менен жетишилди. Бирок өлкөнүн бересеси дагы деле жогорку чекти көрсөтүп жатат. Азыркы тапта карыз ички дүң өнүмдүн 57 пайызына туура келип жатат. Эл аралык изилдөөлөрдө эгер бул көрсөткүч 60 пайызга жете турган болсо, өлкө экономикасына коопту деп саналат. Андан кутулуу убактысынын «чокусу» алдыңкы эки жылга белгиленген. Бирок анык убактысы дагы жылдырыла турганын каржы министринин орун басары Мирлан Байгөнчөков кабарлады.
