Кыргыз Республикасы Дубайда өтө турган ЭКСПО-2020 эл аралык көргөзмөсүнө катышат. Бул боюнча келишимге Кыргызстандын Соода-өнөр жай палатасынын президенти Марат Шаршекеев менен «Дубай ЭКСПО-2020» Бюросунун директору Наджип Мохаммед Ал Али кол коюшту. Бул тууралуу Соода-өнөр жай палатасынан кабарлашты.
Анда Наджип Мохаммед Ал Али эл аралык көргөзмөгө дүйнөнүн көпчүлүк өлкөлөрү жана эл аралык уюмдар тарабынан зор кызыгуу болуп жатканын белгиледи.
Өз кезегинде Марат Шаршекеев чакыруу үчүн ыраазылык билдирип, көргөзмөдө Кыргызстандын экономикалык жана туристтик мүмкүнчүлүгү көрсөтүлүп, кыргыз элинин каада-салты жана маданияты да чагылдырылаарын кошумчалады.
Эске салсак, ЭКСПО-2020 көргөзмөсү 2020-жылдын 20-октябрынан 2021-жылдын 10-апрелине чейин Бириккен араб эмираттарынын Дубай шаарында өтөт. Көргөзмөгө 180 мамлекет катышып, жалпы 25 млн киши келээри болжолдонууда.
