КРнын Экономика министринин орун басары Эльдар Абакиров 10–13 декабрь күндөрү Аргентинанын Буэнос-Айрес шаарында өткөн Дүйнөлүк соода уюмдун министрлер конференциясынын жалпы жыйынында сөз сүйлөгөнүн министрликтин басма сөз кызматы билдирди.
Дүйнөлүк соода уюмдун министрлер конференциясы Дүйнөлүк соода уюмунун жогорку өкмөттөр аралык органы болуп саналат. Эки жылда бир өтчү иш чарага ДСУга мүчө өлкөлөрдүн министрлери катышышат.
Өз сөзүндө Э. Абакиров соода процедураларын жөнөкөйлөтүү принциптерин колдоого чакырды. “Кыргыз Республикасы соода процедураларын жеңилдетүү боюнча жакында эле кабыл алынган Макулдашуу эффективдүү болот деп ишенет. Ал деңизге чыгууга мүмкүнчүлүгү бар өлкөлөр үчүн өтө маанилүү”,-деди Э. Абакиров
Э. Абакиров деңизге чыгууга мүмкүнчүлүгү жок Кыргызстан сыяктуу өлкөлөргө тоскоолдуктарсыз соода каттамдары маанилүү экенин кошумчалады.
КРнын Экономика министринин орун басары бул тармакта ишти жакшыртуу боюнча ишти улантуу керектигин айтып, башка мүчөлөрдү дагы буга чакырды.
Кыргыз Республикасынын өкүлү тарабынан товарларды ташуу маселелеринен тышкары учурда кызматтарды соодалоо тармагында чектөөлөр бар экени белгиленди. Бул тармакта квоталар дагы чектелген. Э. Абакиров ДСУга мүчө өлкөлөргө жогоруда аталган тоскоолдуктарды жоюу боюнча сүйлөшүүлөрдү жандантуу керектигин кошумчалады.
Сөзүн жыйынтыктап жатып Э. Абакиров Кыргыз Республикасы ДСУГа Беларусиянын кошулуусун колдой турганын билдирди.
