Көзөмөл өткөрүү бекетинен алыс эмес жерде кыргыз тарапта концерттик программа болуп, расмий өкүлдөр сөз сүйлөштү. Иш-чарада Кыргызстандын расмий делегациясын вице-премьер-министр Дүйшөнбек Зилалиев жетектесе, өзбек тараптан Андижан облусунун жетекчиси Шухратбек Абдурахманов башында турду.
Өз сөздөрүндө алар Өзбекстандын президенти Шавкат Мирзиёев Кыргызстанга келип натыйжада эки өлкөнүн президенттеринин макулдашуусуна ылайык, эки республиканын чек арасы ачылганын белгилешти.
Мындан сырткары Кыргызстан менен Өзбекстандын бийлиги Андижан-Ош-Кашкар жолун ачууну пландап жатышканын Андижан облусунун губернатору Шухратбек Абдурахманов билдирди.
Эл алдында сөз сүйлөп жатып аткаминер кубанычын жашырган жок жана 20 жылдан бери Бишкекке биринчи жолу Оштон Бишкекке учак менен келип кеткенин белгиледи.
Ал эми Жогорку Кеңештин КСДП фракциясынын депутаты Искендер Матраимов 2017-жылдын 5–6-сентябрь күндөрү кыргы-өзбек мамилесинин тарыхында алтын тамгалар менен жазылып калаарын билдирди.
“«Достук» көзөмөл өткөрүү бекети өзүнүн аталышына төп келип турат”,-деди эл өкүлү.
Эске сала кетсек, 2017-жылдын 5–6 сентябрында Кыргызстанга Өзбекстан Республикасынын Президенти Шавкат Мирзиёев мамлекеттик визит менен келип кетти. Анын алкагында эки өлкөнүн президенттери тарабынан бир катар документтерге кол коюлган. Анын ичинде кыргыз-өзбек чек арасы тууралуу келишим. Ага ылайык, жалпы чек аранын 85%ы такталды.
«Достук» көзөмөл өткөрүү бекетинин ачылышы эки өлкөнүн чектеш аймактарындагы соода байланыш мамилелерин жакшыртат.
