Ала-Букадагы кыргыз-өзбек чек ара бекети эки тараптуу толук иштей баштады. Бул тууралуу өкмөттүн Жалал-Абад облусундагы өкүлүнүн биринчи орун басары Мамасалы Акматов билдирди.
Анын айтымында, бүгүн 19-сентябрда кыргыз жана өзбек тараптын жергиликтүү бийлик өкүлдөрүнүн катышуусунда «Баймак» чек ара бекети толук ачылып, иштей баштады.
Буга чейин 16-сентябрда өкмөт башчы Сапар Исаковдун буйругуна ылайык чек ара бекети кыргыз тараптан ачылганы менен өзбек жак техникалык оңдоого байланышуу убактылуу жаап турууну суранган.
Эске сала кетсек, 5–6-сентябрда өзбек президенти Шавкат Мирзиёев Бишкекке эки күндүк мамлекеттик сапар менен келип, чек ара боюнча өткөөл келишимге кол коюлган.
6-сентябрда Оштогу «Достук» бекетинде чектөөнүн алынышы салтанаттуу белгиленген. Жалпысынан Кыргызстан менен Өзбекстан ортосунда 15 чек ара бекети бар. Анын 11и автоунаа, 4 темир жол. Дээрлик баарында Кыргызстандагы 2010-жылдагы апрелдик ыңкылаптан кийин өтүү татаалдаган. Өзбек өкмөтү кыргызстандыктарга өлкөгө чакыруу же телеграмма менен гана кирүүгө уруксат берген.
Эми чек ара аймактарында жашаган тургундар коңшу өлкөгө баруу менен соода байланыштарын дагы чыңдашса болот. Белгилей кетсек, Жалал-Абад облусунун Ала-Бука районунда жер-жемиштер эрте бышып, соода кылууга чоң мүмкүнчүлүктөр бар.
“Достук” чек ара бекети аркылуу Ош облусунда дагы соода-экономикалык мамилелер жандуу болуп келген.
