Кыргыз өкмөтү БУУнун азык-түлүк программасы менен биргеликте коопсуз тамактануу боюнча келишимге кол коюшту. Ага ылайык, 5 жыл ичинде кызматташуунун алкагында 60 млн доллар каражат бөлүнөт.
БУУнун Кыргызстандагы өкүлчүлүгү кабарлагандай, тараптар 2018–2022-жылга карата меморандумга кол коюшту. Анын негизинде мектептердеги тамак-аштын сапатын жакшыртуу, айыл жашоосунун деңгээлин көтөрүү, айыл чарбасындагы өндүрүштү жогорулатуу иштери аткарылат.
Мындан тышкары, айыл жергесиндеги мектептерди тийиштүү техника менен камсыздоо, инфраструктураны жакшыртуу жана жаратылыш кырсыктарынын кесепеттерин жоюу пландары да ишке ашат.
Өзгөчө ирригациялык системага көңүл бөлүнүп, айыл чарба продукцияларын кайра иштетүү, калкты кесиптик чеберчиликтерге окутуу, киреше алып келе турчу ишмердүүлүктөрдү үйрөтүү пландары жүзөгө ашырылат.
