Бишкекте, Айыл-чарба, тамак-аш өнөр-жайы жана мелиорация министрлигинин Өсүмдүктөрдүн карантини департаментинде чек арадагы фитосанитардык абал тууралуу жана Кыргыз Республикасынын айыл-чарба өнүмдөрүн ташуудагы көйгөйлөрдү чечүү жолдору тууралуу тегерек стол болду.
Иш-чарага Айыл-чарба министрлигинин, Экономика министрлигинин, «Адал жана Айсун» ЖЧКсынын, «Кочкорбаева» ЖЧКсынын, «Фосил» ЖЧКсынын, «Дыйкан Ордо Сервис» ЖЧКсынын, «Дыйкан Дордой» ЖЧКсынын, «ТопАгро» ЖЧКсынын өкүлдөрү жана өсүмдүктөрдү экспорттоочу компаниялардын өкүлдөрү катышышты.
Тегерек столдун катышуучулары ата мекендик өнүмдү ЕАЭБге ташуудагы кыйынчылыктар, кыргыз-казак чек арасындагы көйгөйлөр тууралуу талкуулашты.
Министрликтин маалыматына ылайык, казак тарап карантиндик жана фитосанитардык текшерүүнү күчөткөндөн бери Министрликке ЕАЭБдин фитосанитардык талаптары бузулгандыгы тууралуу 152 нота келген. Аларын ичинен:
–фитосанитардык сертификаттын жоктугу;
–фитосанитардык сертификаттар жасалмама экени;
–маркировканын жоктугу;
–карантиндик зыянкечтер бар экени аныкталган.
Баардык фактылар боюнча кызматтык териштирүүлөр болуп, мыйзам бузууларды алдын алуучу иш-чаралар өткөрүлгөн. Ошондой эле Казакстан менен эки тараптуу кызматташуунун негизинде аткарылчу “Жол картасы” бекитилген.
Тегерек столдун катышуучуларынын пикиринде, көйгөйдү чечүү эки тараптуу кызматташуудан көз каранды жана бир катар компаниялар фитосанитардык текшерүү учурунда тиешелүү документтерди көрсөтүүгө даяр экенин билдиришти.
