Учурда Бишкек-Ош унаа жолу жабык. Унаа жолдун 246-чакырымындагы Көчкү-Булак тилкесине түшкөн кар көчкүнү тазалоо иштери улантылып жатат. Ошол себептүү ӨКМ жүргүнчүлөрдү Бишкек-Ош багытында алыс жолго чыкпоого чакырат. Анткени көчкү тазалоо иштер бүтмөйүнчө жол ачылбайт.
Азыркы тапта жолго түшкөн 144 миң м3 карды тазалоого 4 жүктөгүч, 1 бульдозер тартылып, иш жүргүзүлүүдө.
Жеринде 41 куткаруучу, Өзгөчө кырдаалдар министрлигинин Жалал-Абад облустук башкармалыгынан ыкчам топ, министрликтин Кризистик кырдаалдарды башкаруу борборунан көчмө кыймылдуу пункту тартылган.
Азыркы учурда Токтогул районунун “Арал” постунда 2 чатыр, Жайыл районунун “Сосновка” постунда 2 мобилдик турак үйдө, Талас районунун Суусамыр-Талас-Тараз унаа жолунун 1-чакырымында (Өтмөк ашуусу) 1 чатыр тигилип жүргүнчүлөргө ысык чай, тамак-аш уюштурулган.
Ошондой эле, Талас районунун Талды-Булак айылында №36 ЖТИнин имаратында жүргүнчүлөргө ысык чай, тамак-аш уюштурулган.
Азыркы учурда Сосновка постунда 95 оор жүк ташуучу, Арал постунда 50 оор жүк ташуучу, 60 жеңил унаалар турат. Ал эми Өтмөк ашуусунда 10 оор жүк ташуучу унаалар турат. Жайыл районунун Сосновка постунан Таласты көздөй унаалар өткөрүлүп жатат. Кошумча маалымат берилет.
