2017-жылдын 20-декабрында КРнын Экономика министрлигинде министр Артем Новиков менен Европа реконструкциялоо жана өнүктүрүү банкынын Түркия, Кыргыз Республикасы, Румыния жана Азербайджандагы директору Ташкин Темиз менен жана Борбор Азия жана Россиядагы директору Наталья Ханженкова менен жолугушту.
Тараптар Кыргызстан менен ЕРӨБ 1993-жылдан тарта жемиштүү кызматташып келишкенин жана инвестиция тартууда ЕРӨБдүн мааниси зо экенин белгилешти. Банк 700 млн евролук 160 долбоорду ишке ашырганын Экономика министрлигинин басма сөз кызматы билдирди.
Министр А. Новиков Банкка “Таза Коом” эл аралык конференциясын өткөрүүдө көмөк көрсөткөнү үчүн Банкка ыраазычылык билдирип, бул улуттук долбоорду ишке ашырууда ЕРӨБ активдүүлугүн көрсөтөрүнө ишенерин белгиледи. “Юридикалык жактарды электронду каттоо”, “Нотариусту электрондук каттоо”, “Патенттерди электрондук каттоо”, “Кыймылсыз мүлктү электрондук каттоо” сыяктуу долбоорлорду ишке ашырууда ЕРӨБдүн жардамы маанилүү экени айтылды.
Мындан сырткары министр учурда КРнын Өкмөтү тарабынан 2018–2023-жылдарга карата экспортту өнүктүрүү боюнча программа иштелип чыгып жатканын белгиледи. Анда негизги тармактар жеңил өнөр жайы, сүттү кайра иштетүү,ишкерлерди каржылоо ж.б. кирген. Буга байланыштуу ЕРӨБ бул планды ишке ашырууда эффективдүү колдоо берерине ишенерин билдирди министр.
Жолугушууда муниципалдык инфраструктураны жакшыртуу тармагындагы долбоорлор талкууланды. Шаардык транспортту жакшыртуу, Бишкек жана Ош шаарларын таштандылардан арылтуу, таза суу менен камсыз кылуу долбоорлору каралды. Учурда бул тармакта республиканын 12 шаарында долбоорлор ишке ашууда.
Өз кезегинде Ханженкова мурда уран казылып алынган жерлер боюнча каржы жагынан жардам көрсөтүүгө даяр экенин билдирди. Жолугушуунун акырында тараптар КР менен ЕРӨБдүн мындан аркы кызматташуусу да жемиштүү болоруна ишенерин билдиришти.
