Банк секторунун насыялар портфелин долларлаштыруу деңгээли 2017-жылы 2016-жылга салыштырмалуу орточо алганда 4,3%га азайып, 41,3%ды түздү. Депозиттик базаны долларлаштыруу деңгээли 2016-жылга салыштырганда 7,2%га азайып, 49 %ды түздү. Бул тууралуу премьер-министри Мухаммедкалый Абылгазиев бүгүн, 14-июнда парламенттин жалпы жыйынында 2017-жылдагы аткарылган иш боюнча отчет берип жатып билдирди.
Абылгазиевдин айтымында, улуттук валютадагы насыялар боюнча орточо үстөк 19,8%ды түзүп, мурунку жылга салыштырганда 4,7%га азайды, чет өлкөлүк валютада – 10,5 % болуп, 2%га азайды. Өткөн жылы инфляция 3,7% түздү. Тышкы карыз өлкөнүн ички дүң продукциясына карата 53,9% барабар болду.
«Билим берүүгө 33 млрд сомдон ашык каражат жумшалып, бекитилген бюджеттен 18%га ашкан.
2017-жылы республикалык бюджеттен «капиталдык салым» беренеси боюнча 8,6 млрд сом бөлүндү. Бул каражаттарга 76 билим берүү мекемелери салынып, анын ичинен 18 мектеп жаңы курулду. Бир жылдын ичинде эле 6 жаңы медициналык мекеме салынып, 4 оорукана капиталдык ремонттон өткөрүлдү.
