Премьер-министр Мухаммедкалый Абылгазиев 7-июнда коммерциялык банктардын жетекчилери менен жолугушуу өткөрдү. Бул тууралуу өкмөттүн маалымат кызматы кабарлады.
Абылгазиевдин айтымында, аймактарды өнүктүрүү маселесине өзгөчө көңүл бурулууда. Бул процессте коммерциялык банктар жана финансылык уюмдар маанилүү роль ойношу керек. Дал ушул кредиттик ресурстар жаңы ишканалардын ачылышына, жумушчу орундардын түзүлүшүнө өбөлгө түзөт. Ошондуктан банктар тарабынан жүргүзүлүп жаткан кредит берүү саясаты аймактарга да багытталышы кажет.
Өкмөт башчы Аймактарды өнүктүрүү концепциясы алкагында ирригациялык тутумдарга жана ичүүчү таза суу менен камсыздоого басым жасалаарын белгиледи.
«Учурда банктардын кредиттик ресурстары негизинен Бишкек, Ош шаарларында жана Чүй облусунда топтолгондугу байкалат. Ал эми региондордо абал башкача. Биз үстүбүздөгү жылдан тарта аймактарды өнүктүрүүдөгү келечектеги тутумдук өзгөртүүлөр үчүн негиз салышыбыз керек жана жер-жерлерде ишкерлер үчүн насыяга жеткиликтүүлүктү камсыздообуз зарыл. Алардын арзан жана узак мөөнөттүү акча каражатын алууга мүмкүнчүлүгү болуусу керек. Буга байланыштуу Өкмөт коммерциялык банктарды 20 өнүгүү борборунун алкагындагы долбоорлорго активдүү катышууга чакырат»,- деди Абылгазиев.
Өз кезегинде коммерциялык банктардын өкүлдөрү көптөгөн мамлекеттик программаларга катышууга, аймактардагы ишкерлерди колдоого жана мамлекетти өнүктүрүүдөгү негизги артыкчылыктардын бири саналган адамдык мүмкүнчүлүктөрдү өнүктүрүүгө даярдыгын билдиришти.
Премьер-министр коммерциялык банктарга аймактардагы баш кеңсесин ачууда салык жеңилдиктерин берүү аркылуу өбөлгөлөө чаралары карала турганын кошумчалады.
