Бүгүн, 8-июнда премьер-министр Мухаммедкалый Абылгазиев, Нарын облусуна жасаган жумушчу сапарынын алкагында Кочкор районунун Ара-Көл айылындагы орто мектептин имаратынын курулушуна капсула салуу аземине катышты.
Аталган мектеп райондук борбордон 30 чакырым алыстыкта жайгашкан. Ал 2 окуу корпусунан турат жана анда 136 бала билим алат. Учурда мектептин шыбынан жана дубалдарынан жарака кеткен. Мындан тышкары, мектеп имараты сейсмикалык талаптарга жооп бербейт.
2017-жылдын 27-февралында аталган имаратта окуу процессин улантуу окуучулардын жана мугалимдердин өмүрүнө жана ден соолугуна кооптуулук жарата тургандыгы тууралуу чечим чыгарылган.
Премьер-министр тийиштүү мамлекеттик органдарга аталган окуу жайын куруу үчүн 10 млн сом бөлүүнү тапшырды.
