Казакстандын Кондитерлер ассоциациясы жана алкоголсуз ичимдиктерди чыгаруучулар ассоциациясы ЕАЭБдин аймагына кант ташып келүүгө чектөө коюуга каршы экенин билдиришти. Бул тууралуу алар маалымат жыйынында айтышты.
Казакстан кондитерлер ассоциациясынын вице-президенти Ерлан Ахметовдун билдиришинче, Орусия менен Беларустун ири кант өндүрүүчлөрү ЕАЭБ аймагында кант импортуна тыюу салуу сунушу менен чыгууга ниеттенишүүдө. Бул демилге 25-октябрда Ереванда өтө турган ЕАЭБ өлкөлөрүнүн өкмөт башчыларынын жыйынында көтөрүлөт.
Казакстандык өндүрүүчүлөр эгер бул сунуш колдоо тапса, анда чет өлкөдөн импорттолгон кантка 30–40 пайыз көлөмгө чейин бажы салыгы салынарын, канттан жасалган өнүмдөр, анын ичинде кондитердик азыктар менен суусундуктардын баасы да ушундай өлчөмдө кымбатташы мүмкүн экенин айтышууда.
Казакстандык өндүрүүчүлөр учурда ЕАЭБ келишими боюнча тыштан кантты бажы салыгы жок импорттошот.
Ассоциация өкүлдөрү эгер казакстандык өндүрүүчүлөр кантты ЕАЭБге мүчө өлкөлөрдөн гана сатып алса, Орусия менен Беларустун кант өндүрүүчүлөрү өз алдынча баа саясатын аныктап калышат деп кооптонушууда. Мындан сырткары ассоциация өкүлдөрү ЕАЭБге мүчө мамлекеттер ички рынокту камсыз кыла алары тууралуу мониторинг жүргүзүүнү сунушташты.
Кыргызстанда 1-октябрдан тарта “Кошой” кант заводу иштеп баштады. Ата мекендик дыйкандар кант кызылчасын сатууга мүмкүнчүлүк түзүлгөнүнө кубанышууда. Ал эм даяр канттар кандай бөлүштүрүлөрү суроо туудурууда. 2019-жылга чейин “Кошой” Кыргызстанды толугу менен камсыз кыла алат. Эгерде ЕАЭБдин аймагына башка өлкөлөрдөн кант ташууга чектөө киргизилсе анда Кыргызстандын экспорт боюнча планы ишке ашат.
