Казакстандан техникалык адистер, экономисттер жана мугалимдер кетип жатканын коңшу өлкөнүн ММКсы жазып чыкты.
Казакстандык адистердин чет жакка кетүүсү акыры 4 жылда күч алган.
Үстүбүздөгү жылдын 9 айында өлкөгө дайыма жашоого, окууга жана иштөөгө11,9 миң адам келген. Ал эми Казакстандан ошол эле себептер менен кеткендердин саны 2 эсеге көп же 28,2 миң адам.
Эске сала кетсек, 2007-жылдан 2011-жылга чейин Казакстанга келгендердин саны жогору болчу. Бирок 2012-жылдан тарта өлкөгө келгендердин жана кеткендердин саны теңелип калган. Андан бери Казакстандан чыгып кеткендердин саны жыл санап өсүүдө.
Экономисттер, мугалимдер, медиктер жана техникалык адистер өлкөдөн көп кетишүүдө. Быйыл республикадан 4,8 миң техникалык адис, 2,7 миң экономист, 1,7 миң мугалим чыгып кетишкен. Казакстанга келгендердин ичинен техникалык жана экономикалык адистер 627 болсо, мугалимдердин саны болгону 537.
Расмий маалыматтарга ылайык, өлкөдөн кеткен жарандардын көбү КМШ мамлекеттерине барышууда.
Акыркы 4 жылдын ичинде техникалык адистердин кетүүсү 63,9%га чейин өскөн.
10 жыл мурун же 2007-жылы экономисттердин кетүүсү рекорддук көрсөткүчкө жеткен. Ал учурда 9 айда өлкөдөн 2,73 миң адис кеткен. Ал эми келген экономисттердин саны 1,7 миң болгон, быйылкы жылга салыштырмалуу 2,7 эсеге көп.
Акыркы 4 жыл ичинде Казакстандан кетүүнү каалаган мугалимдердин саны 55,2%га көбөйсө, келгендердин саны 26,3%га аз.
Ошондой эле өлкөдөн медиктер дагы көп кетишүүдө. 2013-жылдын январь-сентябрь айларына салыштырмалуу быйыл 31,6%га көп медик өлкөдөн чыгып кеткен.
Адистердин өлкөдөн көп чыгып кетүү маселеси казак парламентинде дагы талкууга алынууда. Айрымдар гранттардын эсебинен чет жакка, мисалы, Орусияга, Чехияга, Кытайга окууга кеткен жаштар көп болуп, алар кайра өлкөгө келбей жатканын айтышууда.
Коңшулар бул маселеге олуттуу карап жатышса, Кыргызстандан массалык түрдө адамдар кетип жатканы кадимки көрүнүш болуп калган.
