Канадалык фотограф Кейт Тестер Казакстандын улуттук банкын автордук укуктарды бузуп жатат деп айыптады. Буга 500 теңгелик банкнотага ак чардактын сүрөтүнүн түшүрүлгөнү себеп болду. Бул тууралуу “Азаттык” Радиосу билдирди. Фотографтын айтымында, ал 2010-жылы Канададагы Принц Эдуарддын аралында тарткан сүрөтү акчага түшүрүлгөн.
Алгачкы жолу сүрөт 2010-жылдын 24-июнунда Deviantart сайтына жайгаштырылган. Сүрөттү купюрага түшүрүшкөнү тууралуу Тестер жакында эле билген.
Тестер билдиргендей, жактоочу жалдоого каражаты жок. Бирок ал Казакстандын борбордук банкы анын сүрөтүн колдонгонун мойнуна алуусу керек деп эсептейт.
2017-жылдын декабрь айында Улуттук банкты ак чардактын сүрөтүн уурдап алышканы тууралуу алгач ирээт күнөөлөшкөн. Жергиликтүү колдонуучулар ушуга окшош сүрөт интернетте жүргөнүн билдиришкен. Анын автору швейцариялык фотограф Марсель Буркхард экени белгилүү болгон жана ал сүрөт 100 пайыз окшош экенин билдирип, авторун көрсөтүүнү талап кылган.
500 теңгелик банкноталар Казакстанда 2017-жылдын ноябрында чыгарылган. Улуттук банк болсо ак чардактар баары окшош болорун, ал эми банкнотадагы сүрөт колго тартылганын билдирген болчу.
