Коопсуздук кеңешинин катчысы Дамир Сагынбаев «KAZ Minerals Bozymchak» компаниясынын башкы директору Ильяс Тулекеевге козголгон кылмыш иши тууралуу маалымат берди. Аталган кеңештин катчысынын айтымында Тулекеевге каршы иш 2017-жылы ачылган. Бирок негизсиз эле токтоп калган.
Аталган иш прокуратура тарабынан кайра жандандырылып ага айыбы угузулган. Дамир Сагынбаевдин маалыматында «KAZ Minerals Bozymchak» ишканасынын мамлекетке карызы 300 млн сомго чукулдайт. Анын ичинен салыкка болгон карызы 55 млн сом. Тулекеевге кылмыш иши козголгондон кийин аталган компания келтирген каржылык чыгымды төлөп берүүгө көнгөн.
— «KAZ Minerals Bozymchak» компаниясынын менеджери кармалгандан кийин Социалдык фондго, Салык кызматына карызы бар башка дагы компаниялар өлкөгө келтирген чыгымды төлөп берип жатышат. Үч күндүн ичинде алты ири компания бюджетке 33 млн сом салыкты төлөштү.
Эске салсак Экономикалык кылмыштарга каршы күрөш кызматы «KAZ Minerals Bozymchak» компаниясы өлкөдөн 9,8 миң тонна алтын аралашмасын ташып кеткенин аныктаган.
Компаниянын башкы директору Ильяс Тулекеев 26-майда «Манас» эл аралык аэропортунда кармалып, тергөө абагына камалган. Ал эми 27-майда Бишкектин Биринчи май райондук соту аны камактан бошоткон.
Булак: Марал радиосу
