Кыргыз Республикасынын Финансы министрлигинин Окуу борбору 2018-жылы жаңы 4 дистанттык онлайн курсту киргизүүнү пландаштырып жатат.
Бул онлайн курстар программалык бюджеттештирүү, дем берүүчү гранттарды алууга долбоорлорду даярдоо, Бирдиктүү казыналык эсептин иштөө тартиби, жергиликтүү бюджеттерди түзүү жана аткаруу сыяктуу багыттарды камтыйт.
Ушул тапта кошумча 4 онлайн курстарды кыргыз жана орус тилдеринде Дүйнөлүк банктын Кыргыз Республикасындагы өкүлчүлүгү менен биргеликте иштеп чыгуу боюнча иш жүрүп жатат.
Белгилей кетсек, бул курстардан тышкары, бүгүнкү күндө Окуу борборунун Билим берүү порталында мамлекеттик сатып алуулар боюнча 4 дистанттык онлайн курс киргизилип, алар ийгиликтүү иштеп жатат.
Ошондой эле, Окуу борбору тарабынан 2018-жылдын 1-апрелинен тартып тестирлөөнүн жана сертификаттарды генерациялоонун жаңы электрондук системасы менен кошо бирдиктүү маалыматтык системасы киргизилген.
«Биздин курстарыбыз аяктаганда угуучулар сертификаттарды алууга тест тапшырышат. Курстардын угуучусу белгилүү бир жол-жоболордон өтүү менен тийиштүү баллдарды топтоп, тестти тапшыргандан кийин, ал автоматтык түрдө белгилүү бир убакыт өткөндөн кийин экрандан өз сертификатын ала алат. Андан соң бул генерацияланган сертификатты каалаган убакта каалаган маалыматты топтоочу каражаттан кагазга басып чыгарууга болот. Жүргүзүлгөн тестирлөөнүн бардык жыйынтыктары Окуу борборунун Маалыматтар базасында сакталат», – деп белгиледи Окуу борборунун окуу иштери боюнча бөлүм башчысы Эрке Турдумамбетова.
