Кыргыз Республикасынын Финансы министрлиги Чүй областынын Москва районунун Беловодский балдар психоневрологиялык социалдык-стационардык мекемесинин жаңы корпусунун курулушун кошумча каржылайт.
Бул максатта Кыргыз Республикасынын Өкмөтүнүн 2018-жылдын 28-апрелиндеги республикалык бюджеттин «капиталдык салымдар» беренесинин эсебинен балдар мекемесин 69 млн сом өлчөмүндө кошумча каржылоо тууралуу буйругу чыккан.
Буга чейин 2018-жылдын 27-февралына карата Кыргыз Республикасынын Финансы министрлиги балдар мекемесине 2018-жылга каралган 5 млн сом өлчөмүндөгү каражатты толук бөлүп берген.
КРнын Жогорку Кеңешинин профилдик комитети аталган корпустун курулушун кошумча каржылоо тууралуу оң чечим чыгарып берген. Азыркы кезде республикалык бюджеттин “капиталдык салымдар” беренесинин эсебинен каржылануучу объекттердин тизмеси Кыргыз Өкмөтү тарабынын макулдашуу процесси жүрүп жатат. Бул тизме бекитилгенден кийин Каржы министрлиги Беловодский балдар психоневрологиялык социалдык-стационардык мекемесинин жаңы корпусунун курулушун каржылоону ачууга даяр.
Белгилей кетсек, аталган мекеменин жетекчилиги капиталдык оңдоп-түзөөгө муктаж болуп турган эски корпустардын аянычтуу абалын эске алуу менен балдар мекемесинин тарбиялануучулары үчүн жаңы салынып жаткан корпустун курулуш иштерин тездетүү өтүнүчү менен жалпыга маалымдоо каражаттары аркылуу кайрылган.
