Кыргыз Республикасынын Финансы министрлиги 2018-жылдын 1-кварталына карата республикалык бюджеттин аткарылышынын жыйынтыгы тууралуу маалымат жыйын уюштурду.
Финансы министринин орун басары Мирлан Байгончоковдун айтымында, Улуттук статистикалык комитеттин маалыматы боюнча 3 айдын жыйынтыгы менен ИДПнын анык өсүшү 1,3% деңгээлинде аныкталып, ИДПнын номиналдык көлөмү 98,3 млрд сомду түздү.
«Мамлекеттик бюджеттин аткарылышы 32,4 млрд сомду, чыгаша жагы 31,3 млрд сомду түздү. Киреше булагы 1,1 млрд сомго көп аткарылды. Республикалык бюджеттин жалпы киреше булагы 28,6 млрд сом, чыгаша жагы 28,6 млрд сомду ээледи», — деп маалымдады М.Байгончоков.
Республикалык бюджеттин киреше булагы боюнча, аталган 28,6 млрд сомдун 23,7 салыктык кирешелер (аткарылышы — 107,6%), 3,8 млрд сом салыктык эмес кирешелер (102,2%). 1,1 млрд сом – расмий трансферттер.
Ал эми чыгаша жагы боюнча, республикалык бюджеттин жалпы чыгашасынын 51,8%ы (15,4 млрд сом) социалдык чөйрөгө жумшалды. Бул көрсөткүч 2017-жылга салыштырмалуу 1,6 млрд сомго көп.
М.Байгончоковдун маалыматы боюнча, 2018-жылдын 28-февралына карата мамлекеттик карыздын көлөмү 4 млрд 403 млн АКШ долларын түздү, анын ичинен 3 млрд 885 млн АКШ доллары – тышкы карыз, 518 млн АКШ доллары – ички карыз. 2018-жылдын январь-март айларында мамлекеттик карызды тейлөө үчүн республикалык бюджеттен 5,2 млрд сом сарпталды, анын ичинен тышкы карыз — 2,6 млрд сом, ички карыз — 2,6 млрд сомго каржыланды.
