КРнын Эсеп палатасы “Ишкерликти өнүктүрүү фонду” микрокредиттик компаниясынын 2015-жылдагы ишмердүүлүгү боюнча пландык текшерүү жүргүзгөн.
Аудит көрсөткөндөй, отчет берүүдө насыяларды төлөө 94,2 пайызга барабар болгон, же пландалган 58,2 млн сомдун 55.2 млн сому төгүлгөн. 40 пайыздан ашуун насыя портфели күмөндүү кредит же жоготуу деп классификацияланган, иштөө тартибине ылайык төлөмдөр ишке ашырылган эмес. Бул насыяларынн 86,0 пайызы 2013–2014 жылдарда берилген.
Улуттук банктын башкаруусунун бир адамга же бир группага 1,0 миллион сомдон ашык насыя берилбейт деген токтомуна карама каршы иштер болгон. Фонддун уставында эң жогорку сумма бир адамга 3,0млн сомдон ашуун эмес деп белгиленген.
ААК кантип жалпы эрежелерди аттап өтүп , өзүнүн насыя өлчөмүн койгону кызык? Жана уставдагы насыя өлчөмү тууралуу түшүндүрмө бере албаган кайсы юридикалык компания бул фондду каттоодон өткөрдү экен?
Фонддогу материалдык жардам жана кызматкерлерге премия берүү тууралуу бекитилген жобону бузушуп, кирешени аткарбай туруп кызматкерлерге негизсиз 210,8 сом өлчөмүндө премия төлөшкөн.
Планды аткарышпаса дагы кызматкерлерге бергени абдан жакшы экен, балким бул дагы дем берүүнүн бир жолу болуп жүрбөсүн, балким мындан кийин кызматкерлер жакшы иштеп калаттыр?
Мамлекеттик мекемени ижарага берүү тууралуу нормативдик-укуктук актыларды бузуу менен 2015-жылы ижара үчүн 136,6 миң сом алынган эмес. КРнын “салыктык төлөмдөр” тууралуу мыйзамына ылайык, бюджетке 30 пайыз киреше же 41 миң сом түшпөй калган.
Балким фонддун кызматкерлери кайрымдуулук менен алектенип, мекемелерди бекер бергени үчүн премия алышкандыр? 136,6 миң сом бюджетке түшпөй калып, бирок 210,8 миң сом премия алышканын башкача түшүндүрүп болбойт.
Фонддун кызматкерлери тарабынан алынган 4,9 млн сом насыя боюнча 2015-жылдагы карыз 3,7 млн сомду түзөт. Ошондой эле негизги сумманы төлөө мөөнөтү 2 миң күндөн, ал эми пайызын төлөө 4 миң күндөн ашып кеткен учур да катталган.
Фонддун айрым кызматкерлерине керектөөчү насыялар азайтылган пайыз үстөгү менен жана бекитилген чектен ашык суммада насыялар берилген. Натыйжада Фонддун пайыздык кирешесинен жоготуулар 1,1 млн сом болгон.
Эсеп палатасынын текшерүүсүнүн натыйжасында “Ишкерликти өнүктүрүү фонду” мамлекеттик акчаны каалашынча колдонгону белгилүү болгон.
