Ордо калаадагы мыйзамсыз курулуштардын айынан жарандарыбыздын укуктары бузулуп жатат.
Ордо калаада көптөгөн көп кабаттуу үйлөр техникалык талаптарды да, жарандардын укуктарын да бузуу менен курулууда. Тилекке каршы, Өкмөттүн да, анын ага караштуу Экологиялык жана техникалык коопсуздук боюнча инспекциясынын да курулуштарды мыйзамды бузуу менен куруп жаткан компанияларды ооздуктаганга алы жетпей калган окшойт. Бул тууралуу депутат Ирина Карамушкина Жогорку Кеӊеш жыйынында билдирди.
«Мисалы, «Эсдемли колтракшн» компаниясы Токтогул көчөсүндө курулушту мыйзам талаптарын бузуу менен курууда. Экотезинспекциянын маалыматына караганда, бул курулуш компаниясы Юстиция министрлигинде катталбаптыр, ар кандай эскертүүлөргө моюн бербейт. Сыягы, Өкмөттүн деле аны токтотууга алы жетпейт окшойт», — деди эл өкүлү.
Депутатка ошол курулушка жанаша жашаган Балдиева аттуу шаар тургуну жардам сурап кайрылыптыр. Анын айтымында, «Ихлас» курулуш компаниясы ал кишинин үйүнүн тегерегине ор казып салган. «Ал адам компанияга кайрылса, анын үйүн бир бөлмөлүү батирге алмаштыруу сунушу берилиптир, ушу кантип болсун. Бул жерде мыйзамсыз курулуштардын айынан жарандарыбыздын укуктары бузулуп жатканы көрүнүп эле турбайбы», — деп кошумчалады Ирина Карамушкина.
