Ичүүчү сууга болгон тарифти 80 пайызга чейин жогорулатуу керек. Бул тууралуу Архитектура, курулуш жана турак жай-коммуналдык чарба мамлекеттик агенттигинин алдындагы Суу чарба департаментинин директору Аскарбек Токтошев маалымат жыйынында билдирди.
Анын айтымында, бүгүнкү күндө ичүүчү сууга болгон тариф өздүк наркынан 3–4 эсеге төмөн.
Алсак, 0,5–1,5 литр бөтөлкөдөгү суунун наркы 15тен 25 сомго чейин турат, ошол эле мезгилде Бишкекте ичүүчү суунун 1 кубометри 5 сом 38 тыйын, айыл жергесинде 3 сомдон жогору.
Токтошевдин маалыматында, суунун өздүк наркы кызмат көрсөтүү, кармоо жана аны калкка жеткирүү менен бирге кеткен чыгымдар менен чогуу каралган.
Тариф жергиликтүү өзүн-өзү башкаруу органдары тарабынан коюлат жана тарифти жогорулатуу саясатын жүргүзүү алардын кызыкчылыгында эмес.
