Экономикалык кылмыштарга каршы күрөш кызматы (мурдагы Финансы полициясы) быйылкы жылдын төрт айында 911 кылмыш ишти тергеди. Анын ичинен 251 иш сотко өткөрүлдү. Бул былтыркыга караганда 103 ишке көп. Бул тууралуу Финполициянын маалымат кызматы тараткан билдирүүдө айтылат.
Ошондой эле Экономикалык кылмыштарга күрөш кызматынын тергөөчүлөрү мурда кыскартылган 139 кылмыш ишти кайрадан карай баштаган. Мунун жыйынтыгында төрт ай ичинде 588 миллион сомдон ашык акча мамлекетке өндүрүлгөнү кабарланды.
Мамлекеттик кызмат бул иштер быйыл февралдагы Коопсуздук кеңешинин чечимин аткаруу алкагында жасалып жатканын билдирүүдө. Аталган жыйында президент Сооронбай Жээнбеков коррупцияга каршы күрөштү күчөтүү тапшырмасын берген эле.
