Кыргыз Өкмөтү жакынкы келечекке артыкчылыктуу реформаларды аныктады, анда баардык аракет бюджеттин киреше бөлүгүн жогорулатуу, мамлекеттик башкаруунун ачык-айкын тутумун түзүүгө багытталат. Мамлекеттик сатып алуулардын ачык-айкындыгы, натыйжалуу мамлекеттик аппарат, адилет салык салуу жана бажы төлөмдөрүн чогултуу, коррупциянын алдын алуу да башкы максат. Бул тууралуу Премьер-министр Сапар Исаков 19-февралда Европа Биримдигинин Борбор Азия боюнча Атайын өкүлү Петер Буриан менен жолугушууда билдирди.
Өкмөт башчы Европа Биримдигине өлкөдөгү шайлоо тутуму, билим берүү жана укук үстөмдүгү жаатындагы реформаларды үзгүлтүксүз колдоого алуусу үчүн ыраазычылык билдирди.
Петер Буриан Кыргызстанда 2017-жылдагы президенттик шайлоо жогорку деңгээлде өткөнүн белгилеп, Өкмөттүн «Жаңы доорго – кырк кадам» жана «Таза Коом» программаларына токтолду. Анын айтымында, Европа Биримдиги өкмөттүк программалар алкагында өнөктөштүктү кеңейтүүгө жана тереңдетүүгө даяр.
Андан тышкары, Евробиримдик Erasmus программасынын алкагында тийиштүү кадрларды даярдоо, сооданы өнүктүрүү жаатында «Таза Коом» үчүн жагымдуу шарт түзүү үстүндө иш алып барууга даяр экенин Петер Буриан кошумчалады.
