Москвада өткөн “Евразиялык аймакта адамдардын укугун коргоодогу көйгөйлөр: омбудсмендердин мыкты практикалары менен алмашуу” деп аталган эл аралык конференцияда Владимир Путин соода-экономикалык байланыштарды чыңдоо тууралуу пикирин билдирди.
“Бүгүн евразиялык аймакта интеграциялык, кооперациялык процесстер активдүү өнүгүүдө. Соода-экономикалык, инвестициялык, гуманитардык байланыштар бекемделүүдө. Биздин өлкөлөрдүн жашоочулары бири-бири менен түз байланыша баштаганы маанилүү роль ойнойт”,-деди ал.
Мындан сырткары В. Путин тажрыйбалар менен алмашуу жана маалыматты тез жеткирүү маанилүү болуп жатканын, адамдардын укуктары боюнча бирдиктүү база түзүү маанилүү экенин кошумчалады.
Орусиянын президенти талкуулар түшүмдүү жана маанилүү болоруна үмүт артарын билдирип, жарандардын социалдык абалынын жакшыруусу үчүн жаңы идеялар жана демилгелер чыгарына ишеним артарын билдирди.
Конференциянын алкагында Орусиянын, Армениянын, Кыргызстандын, Түркиянын акыйкатчылары адам укуктары боюнча ыйгарым укуктуу Евразиялык альянс түзүү боюнча меморандумга кол коюшту.
Бул документ Орусияда жана башка өлкөлөрдө иштеген эмгек мигранттарынын укуктарын көп тараптуу коргоого мүмкүнчүлүк берет.
