Эл аралык валюталык фонд дүйнөлүк экономика 2018–2019-жылдары 3,9% өсөрү күтүлүп жатканын билдирди. Бул октябрдагы божомолдон 0,2 пайыздык пунктка жогору экени World Economic Outlook (WEO) докладында жазылган. Аны менен катар эле КМШ өлкөлөрүндө 2018-жылы 2,2% (жакшыруу божомолу 0,1 п.п), 2019-жылы 2,1% өсүш болору болжолдонууда. Орусияны кошпогондо биримдиктеги өлкөлөрдүн ИДПсынын өсүү темпи 3,4% деңгээлинде болот (жакшыруу божомолу 0,1 п.п), 2019-жылы 3,5% жогорулайт деп жазат investing.com.
Эл аралык валюта фондунун эксперттери билдиришкендей, глобалдык экономикалык активдүүлүк дүйнөдө бекемделүүдө.
Ошону менен бирге өнүгүп келе жаткан өлкөлөр боюнча божомол өзгөрүүсүз калган — 4,9% жана 5%. Индиянын экономикасынын өсүүсү өзгөргөн жок – 2018-жылы 7,4% жана 2019-жылы 7,8%. Бразилияда 2018-жылы өсүш 1,9%, 2019-жылы 2,1% (плюс 0,1%). Фонддун маалыматы боюнча Кытай экономикасынын өсүүсү 0,1 п.п. болуп, 6,6% жана 6,4% болору күтүлүүдө. 2018-жылы Орусиянын экономикасында 1,7%, ал эми 2019-жылы 1,5% өсүш болот.
Өнүккөн өлкөлөрдүн ИДПсы дагы жакшырмакчы: 2018-жылы 2,3%, 2019-жылы 2,2%. АКШнын экономикасынын өсүүсү 2018-жылы 2,7%, 2019-жылы 2,5%. Япониянын экономикалык өсүүсү 2018-жылы 1,2% жана 2019-жылы 0,9% болору күтүлүүдө.
Белгилей кетсек, Эл аралык валюта фондунун божомолуна ылайык, 2017-жылдын жыйынтыгы менен дүйнөлүк ИДПнын өсүүсү 3,7% болгон.
