Өлкө аймагындагы мелдештерге катышкан спортчулар суткасына 109 сом алат. Алар бул акчага үч маал тамактанышы керек. Бул тууралуу депутат Максат Эгембердиев Бюджет жана финансы боюнча комитеттин көчмө жыйынында спорт мектебин каржылоо маселеси каралып жатканда билдирди.
Эл өкүлү бул өтө аз акча экенин айтып, түрмөдө отурган кылмышкерлерге деле ушунча акча сарпталары кошумчалады.
“Эгерде биз аларды каржылоо маселесин жакшыртпасак, анда алардын ден-соолугуна кедергиси тийет. Анда бул окуу жайынан мыкты спортчулар даярдалбай эле, ар кандай оорукчан жаштарды чыгарып калабыз», — деди эл өкүлү.
Олимпиядалык резервдер окуу жайы окуу куралдары менен 60–70 пайызга гана камсыздалганын депутат Бакытбек Райымкулов айтып чыкты.
«Оӊдоо иштерине 34 млн сом сурап жатыпсыӊар, директордун кычыраган кабинетин көргөн адамдар силердин имаратыӊардын баары жайында экен деген ойдо калышы мүмкүн. Кыязы, мурда оӊдоп-түзөө жумуштарына бөлүнгөн каражаттын баары директордун кабинетине жумшалган окшойт».
Спорт мектебинин директору К.Эргешов кабинет ал келгенге чейин оӊдолгонун, директорлукка дайындалганына үч эле ай болгонун билдирди.
