Жогорку Кеӊеште КР Өкмөтү менен РФ Өкмөтүнүн ортосундагы ЕАЭБге кошулуу алкагында Кыргызстанга техникалык көмөк көрсөтүү жөнүндө макулдашууга өзгөртүүлөрдү киргизүү тууралуу протокол боюнча ратификациялык мыйзам долбоору каралып, экинчи окууда добуш берүүгө жөнөтүлдү.
2017-жылдын 29-декабрында аталган макулдашууга өзгөтүүлөрдү киргизүү тууралуу протоколго кол коюлган. Анда Саламаттык сактоо министрлигинин Санитардык-эпидемиологиялык көзөмөл жана ооруулардын алдын алуу департаментинин эки лабораториясын жабдуу жана капиталдык оңдоо иштерин жүргүзүү боюнча өзгөртүүлөрдү киргизүү каралган. Ал жумуштарды 2017-жылы бүткөрүү мүмкүн болбогондуктан, бул мөөнөт 2018-жылга жылдырылууда.
Ошондой эле, Россиянын Федералдык бажы кызматынын сунушуна ылайык, протоколдун долбооруна Кыргызстанда жаныбарларды идентификациялоону техникалык жактан колдоо боюнча иш-чараларды ишке ашыруунун мөөнөтү да узартылууда.
Бир катар депутаттар 200 млн доллар көп каражат экенин, анын жумшалуу жүрүмүн катуу көзөмөлгө алуу керектигин айтышты. Андан сырткары, эл өкүлдөрү келишимдин өз маалында аткарылышын кечеӊдеткен тийиштүү кызмат адамдарынын жоопкерчилигин кароо зарылдыгы белгиленди.
Белгилей кетсек, келишимдин алкагында жасала турган жумуштар россиялык компания тарабынан ишке ашырылат. Буга чейин 12 лаборатория оӊдолуп, жаӊы 4 лаборатория курулду, аларга толугу менен жаӊы жабдуулар орнотулат. Ал эми Бишкек жана Ош шаарларындагы лабораториялардын капиталдык ремонту жыл аягына чейин толугу менен бүткөрүлүп, жаӊыдан жабдылмакчы.
