Жакынкы арада Кыргызстанда кыргыз-өзбек биргелешкен ишканалары ачылат.
Бул тууралуу Экономика министрлигинин алдында инвестицияларды жана экспортту илгерилетүү боюнча мамлекеттик агенттигинин директорунун орун басары Шумкарбек Адилбек уулу билдирди.
Бул дыйкандар үчүн абдан кубанычтуу кабар.
Ишкерликти колдоонун алкагында КРнын Өкмөтү тарабынан тиешелүү кадамдар жасалган. Кыргыз-орус өнүктүрүү фонду ачылды, ал жактан дыйкандар айыл-чарба техникаларын алууга жеңилдетилген насыя ала алышат.
Өзбекстан жана Кыргызстан меморандумга кол коюшту. Ага ылайык, өзбекстандык «УзАвтоСаноат» «АвтоОңдооЗавод» менен бирге Кыргызстанда айыл-чарба техникасын чогултуучу ишкана ачат. Ошондой эле өзбек компаниясы «ДТ Техник» жана «Автоцентр Эстакада» менен бирге автобустарды чогултуучу жана кызмат көрчөтүүчү завод ачышат. Ал эми «Автоцентр Эстакада» жана «Равон Моторс Тянь-Шань» компаниялары унааларды чогултуучу жана дилердик борборлорду ачуучу завод ачуу тууралуу сүйлөшүштү.
Демек, айыл-чарба техникаларынын баасы арзан жана жеткиликтүү болуп калат.
Жаңы компаниялар Бишкекте, Ошто жана Кара-Балтада ачылат.
