Өзбекстандын Борбордук банкы 1 АКШ долларынын курсун улуттук валютага карата 8100 сум деңгээлинде бекитти. Бул өткөн аптага караганда 3889,65 сумга жогору (4210,35 сум).
“2003–2017-жылдарга карата курсту түзүүчү факторлорду анализдөөнүн негизинде жана банктар менен болгон чет өлкөнүн валютасы менен ишке ашыруу боюнча тесттик келишимдердин натыйжасында учурда валютанын курсу 1 долларга карата 8000–8150 сум болууда”,-деп билдирди Борбордук банк.
Борбордук банк сумду башка чет өлкөлүк валюталарга карата дагы девальвациялады.
Евронун курсу сумга карата 9645,48 сум болуп, мурунку курска караганда 4678,601 сумга жогору болду. Русблдун курсу 68,731 сумдан 139,91 сумга жогорулады.
“Борбордук банктын курсу мурдагыдай эле ар бир дүйшөмбү сайын белгиленет жана Өзбекстандын аймагында бухгалтердик эсеп жана башка валюталык операциялар үчүн жана бажы төлөмдөрү жана башка милдеттүү төлөмдөр үчүн колдонулат”,-деп жазылат Борбордук банктын маалыматында.
Өзбекстан президенти 2-сентябрда валюта саясатын либералдаштыруу боюнча жарлык чыгаргандан бери сумдун куну кескин төмөндөдү. Өлкөдө улуттук валюта көп жылдан бери алгач ирет девальвация болууда.
Ушул эле жарлыкка ылайык, 5-сентябрдан тарта өлкө жарандары акча алмаштыруу жайларында чет өлкөлүк валюталарды тоскоолдуксуз сатуу-алуу укугуна ээ болушат.
