Бул тууралуу депутат Жогорку Кеӊеште Агрардык саясат, суу ресурстары, экология жана регионалдык өнүктүрүү боюнча комитеттин демилгеси менен өтүп жаткан «Администрациялык жоопкерчилик жөнүндө кодексине өзгөртүүлөрдү киргизүү тууралуу” мыйзамдын жана “Жаныбарларды идентификациялоо жөнүндө” мыйзамдын аткарылышы боюнча парламенттик угуунун жүрүшүндө билдирди. Иш-чарага мамлекеттик органдар мекемелердин өкүлдөрү, эксперттер менен адистер катышты.
Депутат Экмат Байбакпаев Кыргызстан Евразия экономикалык бирлигинин курамына киргени ветернардык жана фитосанитардык коопсуздук, малды инденфикациялоо чараларына карата талап күчөтүлгөнүн белгиледи.
«Мал сатылган базарларда, мал союлган жайларда, тамак-аш даярдалган жайларда, ылаӊ малдын өлүгү көмүлгөн жерлерде ветеринардык-фитосанитардык көзөмөлдүн сапатын кескин көтөрүү зарылдыгы пайда болду. Тилекке каршы, бул багытта Өкмөт солгун көзөмөл кылып, тийиштүү мамлекеттик органдар менен мекемелер ыкшоо мамиле жасоодо. Ошондуктан, алардын жоопкерчилигин көтөрүү зарыл», — деди ал.
Андан тышкары, малдын ылаӊынан арылып, тамак-аш коопсуздугун камсыз кылып, мал чарбасынын өндүрүлгөн өнүмдөрүн эл аралык стандартка туура келтирүү менен, аны чет өлкөлөргө, анын ичинде ЕАЭБ өлкөлөрүнүн аймагына чыгаруу милдети турат.
«Мында малдын башын иденфикациялоо өтө маанилүү. Ошондон улам, депутаттар тобу тарабынан аталган мыйзамдаргы өзгөртүүлөрдү киргизүү боюнча мыйзам долбоору иштелип чыгып, жоопкерчилик чаралары күчөтүлдү», — деди депутат.
Демилгечинин айтымында, “Жаныбарларды идентификациялоо жөнүндө” мыйзамдын талаптарын бузган кызмат адамдарына карата 50 эсептик көрсөткүчкө чейин айып салуу чаралары каралууда. Өкмөт мыйзам долбооруна оӊ корутундусун берди. Ал парламенттик угуунун жыйынтыгы менен Өкмөткө өлкөдөгү ветеринардык жана фитосанитардык коопсуздукту камсыз кылуу жаатында дагы бир катар сунуштамалар бериле турганын кошумчалады.
