Жогорку Кеӊеш тарабынан Чакан ГЭСтер жөнүндө мыйзам долбоорунун концепциясы жактырылган, бирок экинчи окууда кароо жарым жылга созулуп кетти.
Кыргызстандын гидроэнергетикалык мүмкүнчүлүгү өтө чоӊ, тилекке каршы биз азыр анын 10 пайызын гана пайдаланабыз. Ар куб мерт суу иш жүзүндө 1 кВт/саат электр энергиясын берет. Ушундан эле биз канчалык байлыкты кармап турганыбыз көрүнүп турбайбы. Бул тууралуу депутат Экмат Байбакпаев Жогорку Кеӊештин Басма сөз кызматынын «Жай отуруп баарлашуу» долбоорунун жүрүшүндө билдирди.
«Мисалы, Казакстан өткөн жылы чакан энергетика тармагын өнүктүрүү багытында 256 млн евро көлөмүндө каражат бөлүптүр, андан башка да каражаттары бар, анан өнүгүү болот да. Биз акыркы 20 жыл аралыгында 5–6 гана чакан ГЭС куруптурбуз. Энергетиктер менен ишкерлердин айтымында, бизде жакшы мыйзам жок экен. Көрсө, иштеп жаткан мыйзамда чакан энергетика тармагын өнүктүрүүнүн алгылыктуу механизмдери толук камтылбай калыптыр. Буюрса, 2019-жылдан тарта ЕАЭБ алкагында бирдиктүү энергорынок түзүлгөнү турат. Демек, ал аркылуу өндүрүлгөн электр кубатын Россия чейин жакшы баада сатуу мүмкүнчүлүгү пайда болот. Ошондуктан, чакан ГЭСтерди куруу жаатына өзгөчө көӊүл бурушубуз керек», — дейт Экмат Байбакпаев.
Иш-чарага Жогорку Кеңеш депутаты Экмат Байбакпаев, Өнөр жай, энергетика жана жер казынасын пайдалануу мамлекеттик комитетинин төрагасынын орун басары Азамат Оморов, Энергиянын кайра жаралуучу булактары ассоциациясынын төрайымы Элеонора Казакова, Отун-энергетикалык комплексти жөнгө салуу боюнча мамлекеттик агенттигинин өкүлү, парламентте аккредиттелген жалпыга маалымдоо каражаттарынын журналисттери катышты катышты.
