Мындан ары Кыргызстан өзгөчө кырдаалдар келип чыкканда керектүү көлөмдөгү дарылык каражаттарды Дүйнөлүк соода уюмуна мүчө-мамлекеттерден ийкемдүү жолдор менен ала алат. Бул тууралуу КР Экономика министрлигинин басма сөз кызматы билдирди.
Кыргызстан жакында Бүткүл дүйнөлүк соода уюмунун Интеллектуалдык менчик укуктарын соодалоо багытындагы макулдашуусуна өзгөртүү киргизүү протоколун ратификациялады. Ал протоколго ылайык, жаңы берене менен экспортко багытталган дарылык каражаттарды мажбурлоо жолу аркылуу лицензиялоону кеңири колдонуу тартиби аныкталган.
Кыргызстандын БУУдагы туруктуу өкүлү Данияр Мукашев 6-февралда Женева шаарында Макулдашуунун ратификациялык грамотасын Дүйнөлүк соода уюмунун башкы директору Роберто Азеведуга тапшырды.
