Экономикалык кылмыштуулукка каршы күрөшүү мамлекеттик кызматынын кызматкерлери тарабынан аныкталган коррупциялык схеманын алкагында «Инфинити FX50S» үлгүсүндөгү автоунаа аткезчилик жол менен алынып келгени аныкталды.
Буга чейин кымбат баадагы унааларды Кыргызстандын аймагына алып келүү боюнча коррупциялык схема аныкталган болчу. Ошондой эле Мамлекеттик каттоо кызматынын алдындагы Транспорт каражаттарын жана айдоочулук курамды каттоо департаментинин бөлүмүнүн кызматкерлери кызматтык абалын кыянаттык менен пайдаланганы аныкталган.
2016-жылдын февраль айында аталган депертаменттин Бишкек шаары боюнча жооптуу адистери тарабынан «Инфинити FX50S» унаасы Кыргызстандын жаранына катталган. Андан кийин ага мамлекеттик номур жана транспорт каражатын каттагандыгы тууралуу күбөлүк берилген.
Аталган унаа Белоруссиянын ИИМнин каттосунан чыгарылганы тууралуу документтин негизинде М.Т. атуу жаранга кайра катталган. Бирок аталган өлкөнүн жообуна караганда унаа каттоодон алынган эмес.
Мамлекеттик Бажы кызматынын эсептөөсү боюнча 2008-жылы чыккан «Инфинити FX50S» унаасын каттоо 800 миң сомдон ашык каражатты түзөт.
Топтолгон материалдардын негизинде Башкы прокуратура Кылмыш-жаза кодексиндеги 304-берене (кызматтык абалын кыянатттык менен пайдалануу, 204-берене (контрабанда) жана 350-берененин (документтерди, мамлекеттик сыйлыктарды, штамптарды, мөөрлөрдү, бланктарды колго жасоо, даярдоо, сатуу же алардын жасалмаларын пайдалануу) негизинде кылмыш иш козгоду.
