Кыргызстандын президенти эгерде кыргыз-казак чек ара маселеси чечилбесе ЕАЭБдин кезексиз жыйынын чакыруу укугу бар экенин эске салды.
Бул тууралуу Алмазбек Атамбаев 15-октябрда президенттик шайлоодо добуш берип чыгып билдирди.
Мамлекет башчысы Казакстан буга чейин чек арага чектөөнү шайлоого карата киргизгенин билдиргенин эске салды.
“Казак бийлиги азыркы абал Кыргызстандагы шайлоого байланыштуу деп айтып жатат. Кудай буйруса, шайлоо 1-тур менен бүтсө, ошондон кийин да чек ара ачылбаса, мен ЕАЭБ өлкөлөрүнүн президенттерин чукул жыйын чакырууга талап коюу укугум бар. Эгер маселе чечилбесе, анда бул уюмдун да статусу суроо болуп калат”,-деди ал.
10-октябрдан тарта кыргыз-казак чегиндеги көзөмөл-өткөрмө бекеттеринен жарандардын, автоунаалардын өтүшү кыйынга туруп, узун кезек пайда болгон. Казак тараптан текшерүү күчөп, жарандар бир нече сааттап кезек күтүшкөн. Жергиликтүү бийлик чек арадан алыс эмес жерге чатыр тигип, ысык тамак уюштурган.
12-октябрда Кыргызстандын Чек ара кызматы чек арадагы абал дале өзгөрө элек экенин билдиген.
Казак тарап болсо бул маселе боюнча азырынча сүйлөшүүлөр болору же болбостугу тууралуу үн ката элек.
