Кыргыз Республикасынын Өкмөтү мамлекеттик карызды топтоо динамикасын, ошондой эле бюджеттин тартыштыгынын өлчөмүн тыкыр көзөмөлдөөгө аракеттенүүдө. Бул тууралуу Кыргыз Республикасынын Финансы министрлигинин Эл аралык кызматташуу башкармалыгынын башчысы Бакыт Сыдыков билдирди.
Анын айтымында, 2018-жылдын 30-мартында Кыргыз Республикасынын Өкмөтүнүн токтому менен “Кыргыз Республикасынын Бюджеттик кодексине өзгөртүүлөрдү киргизүү жөнүндө” мыйзам долбоору жактырылган. Бул өзгөртүүлөрдүн максаты — жыл сайын бюджеттин тартыштыгын ИДПга карата 3%дан ашырбоо, ошондой эле мамлекеттик карыздын көлөмүн ИДПнын 70 %нан ашырбоо сыяктуу бюджеттик эрежелерди киргизүү болуп саналат. Азыркы кезде аталган мыйзам долбоору Кыргыз Республикасынын Жогорку Кеңешинин кароосунда.
Маектин жүрүшүндө Б.Сыдыков Кыргыз Республикасынын мамлекеттик бюджеттин өлчөмү тууралуу акыркы маалыматтарды билдирди. 2018-жылдын 28-февралына карата Кыргыз Республикасынын мамлекеттик (тышкы + ички) карызынын өлчөмү 4,4 млрд АКШ долларын түздү, анын ичинен 3 млрд 885 млн АКШ доллары – мамлекеттик тышкы карыз.
