Бишкек мэриясы ушул жылдын аягына чейин сатып алына турган 350 автобустан баш тартты. Бул тууралуу мэриянын маалымат кызматынан кабарлашты.
Маалыматка ылайык, автобустар «Газпромдун» насыясына сатып алынмак. Мындай меморандумга 2017-жылдын 25-декабрында өкмөт үйүндө кол коюлган. Меморандум орусиялык “Газпром Кыргызстан”, “Газпромбанк” “Эксар” ишканалары менен Бишкек мэриясынын жана Социалдык фонддун ортосунда кабыл алынган. Автобустарды сатып алуу үчүн мэрия «Газпромбанктан» 12 пайыз үстөгү менен жети жылга 3,5 млрд сом насыя алмак. Ар бир автобустун баасы 10 млн сомдун тегерегинде болоору айтылган. Мэрия автобустар газ менен жүрөрүн, майыптарга ыңгайлуу экенин жана аларда кондиционер, вай-фай, электрондук төлөө системасы сыяктуу бардык шарттар болорун билдирген.
Белгилей кетсек, Бишкекти толук камсыз кылууга 700гө жакын автобус талап кылынат.
