2017-жылдын 14-декабрында КРнын Экономика министринин орун басары Данияр Иманалиевдин катышуусунда “Бир айыл – бир өнүм” (БАБӨ) долбоору боюнча Коодинациялык комитеттин жыйыны болду, анда “Ысык-Көлдөгү БАБӨ моделин башка аймактарга жайылтуу” долбоорунун жыйынтыктары чыгарылды.
Жолугушууда БАБӨ долбоорун ишке ашыруу, облустардын мүмкүнчүлүктөрү жана башка бир катар маселелер талкууланды.
БАБӨнүн тажрыйбасын башка аймактарга жайылтуу боюнча Япония эл аралык кызматташтык агенттиги (JICA) тарабынан изилдөө жүргүзүлгөн. Анын максаты – республиканын башка аймактарына дагы БАБӨ моделин жайылтуу.
БАБӨ долбоорунун иши жакшы натыйжа бере баштады.
| Жылдар | Өндүрүүчү топтордун саны (жамааттар) | Тартылган адамдардын саны |
| 2011 | 64 | 550 |
| 2016 | 178 | 2000ге жакын |
| 2017 | 220 | 2200гө жакын |
Белгилей кетсек, 2017-жылдын 11 айында сатуунун жалпы көлөмү 2016-жылга салыштырмалуу 35%га жогорулаган.
БАБӨ долбоорун ишке ашыруу процессинин жүрүшүндө жергиликтүү чийки заттан өнүм даярдагандан сырткары аны ички жана тышкы рынокторго сатуу боюнча тажрыйба алышат.
Муну менен катар эле учурда Бишкек шаарында БАБӨ борбору өз ишин баштады. Борбордун негизги максаты — шаарда өндүрүүчүлөр үчүн кеңеш берип, маалымат менен камсыз кылуу. Ошондой эле өнүмдү иштеп чыгууда, аны сатууда жана бизнес байланыштарын жакшыртууда көмөкчү болмокчу.
БАБӨ долбоору – Япония тарабынан демилгеленген жана иштелип чыккан стратегиялык кыймыл. Бул долбоордун уникалдуулугу төмөнкүлөр: максаттуу өнүмдү аныктоо, аны өндүрүү, жергиликтүү ресурстардан гана өндүрүү, таңгактын жана этикетканын дизайнын иштеп чыгуу, сапатына көңүл буруу жана жергиликтүү, дүйнөлүк рынокко алып чыгуу.
