“Баткен” бажысынын контрабандага каршы күрөшүү бөлүмүнүн кызматкерлери тарабынан ЕАЭБтин бажы аймагына мыйзамсыз ташылып келинген 2 тоннадан ашык мандарин кармалды. Бул тууралуу Мамлекеттик бажы кызматынан билдиришти.
ЕАЭБтин Бажы аймагына товарларды жана транспорт каражаттарын мыйзамсыз ташып кирүү фактыларын табуу жана бөгөт коюу боюнча текшерүү жүргүзүлгөн. Текшерүүнүн жыйынтыгында “Баткен” бажысынын контрабандага каршы күрөшүү бөлүмүнүн кызматкерлери тарабынан Баткен областына караштуу Чоң-Талаа айылында, Кыргызстандын жараны Ж.А.Т., башкарган КРдин мамлекеттик номер белгиси менен “Мерседес-Бенц Sprinter 513” үлгүсүндөгү автотранспорттук каражат токтотулуп, текшерилген.
Жогоруда аталган автотранспорттук каражаттын жүк бөлүгүн текшерүү учурда бажы контролунан тышкары ЕАЭБтин бажы аймагына бажыга тийиштүү документтери жок ташып келе жаткан Пакистан Республикасында өндүрүлгөн жалпы салмагы 2021 кг түзгөн мандарин табылган. Кармалган товардын жалпы суммасы 111 155 сомду түзөт.
Иштин материалдары тергөөгө караштуулугу боюнча КРдин ЭКККБна өткөрүлүп берилип, келтирилген зыян 19 841.17 сом өлчөмүндө өндүрүлдү.
